لو سألتني عن اكتر سؤال اتسألته في حياتي فهو بعد سؤال العيلة الدايم هو انتا مش ناوي تحلق شعرك ؟

حضرتك اهلاوي ولا زملكااوي ؟

والحقيقة إجابتي مش بتختلف عن اجابتي علي سؤال البيت !!

نفس الأجابة مش عارف !!!!

ايوة مش عارف انا أهلاوي ولا زملكاووي

طيب هو انا لازم ابقي اهلاوي او لازم اشجع الزمالك يعني

مينفعش مثلا اشجع الأتنين او حتي أشجع الفايز !

طيب ليه يعني أشجع الأهلي واتعصب ليه وليه برودو مأشجعش الزمالك واتعصب ليه ؟

عشان كدا بتفضل إجابتي مش عارف

انا مش عارف انا اهلاوي ولا زملكااوي معظم عمامي أهلاوية ومعظم خوالي زملكاوية انا بقي ايه مش عارف

او انا عارف انا بشجع مين بس انا حوويط شووية والحقيقة الحياة علمتني اني اكون حوويط شوية في الأجابة علي نوعية الأسئلة دي !

عمري ما انسي شكل القهوة اللي في اخر شارع بيسكن في واحد صحبي مش فاكر اسمه واخدني ورحنا نتفرج علي ماتش الأهلي والزمالك وكان شكل القهوة مقسوم نصين صفوف ورا بعض علي الشمال كلها مشجعين شايلين علم الأهلي وع الجنب اليمين عدد زيهم شايلين علم الزمالك .

وفجأة بدأ واحد من الزمالكاوية يلقح ع واحد أهلاوي او حصل العكس الأهلاوي هو اللي بدأ مش فاكر الصراحة وعينك ما تشوف إلا النور واحد من اللي شايلين علم الزمالك مسك إزازة كولا وكسرها ع راس واحد من اللي شايلين علم الأهلي والكراسي تتحدف يمين وشمال وشمال ويمين والمتضرر الأول في الموضوع طبعا هو عم كريم القهوجي بهزر طبعا عم كريم متضرر تاني

المتضرر الأول في الموضوع هو البلد ايوة البلد اللي ناسها بتتقسم نصين كل نص بيكره التاني وكل نص مستعد يشرب من دم النص التاني ومش فارق معاه مين اللي بيضربه ابن عمو او حد قريبه واحيانا بيبقي اخوه.

البلد هي المتضرر الأول واللي أهلها مبقاش عندهم إنتماء ليها اصلا او علي الأقل انتمائهم للنادي اللي بيشجعه أكبر من إنتمائهم ليها .

في مشهد بحب اشوفه جدا بعد مشهد أتنين حبايب ماسكين إيد بعض

مشهد علي قد ما بشفهووش كتير بس بتمني اشوفه في كل وقت وفي كل مباراة

مشهد الكراسي كلها صف واحد الكل قاعد بيضحك وبيبتسم وهما ماسكين علم واحد وبيهتفه هتاف واحد مصر

والقلق باين جوه عنيهم وهما نفسهم وحلمهم بلدهم تاخد البطولة .

وفجأة بتلاقي عمر الأهلاوي بينده علي عم كريم القهوجي يا كيمووو يا كيموو حساب المشاريب النهاردة علي حسابي لكل القهوة فيرد عليه عليه طارق الزملكاووي لا والله يا أستاذ عمر المشاريب عليا انا المرة دي .

وطبعا المستفيد الأول هو عم كريم صاحب القهوة اللي بيعملهم ايام الماتشات

المستفيد الأول بجد هي البلد اللي ولادها بيكونوا ايد في ايد زي اتنين حبايب بيحبوا بعض وبيخافوا علي بعض وكل حلمهم وهدفهم ان البلد هي اللي تفوز وبس

مش مهم مين كان السبب دفاع طارق حامد ولا هجوم رمضان صبحي ولا هدف محمد صلاح .

من الأخر ومن غير لف ولا دوران انا بشجع مصر بشجع الحب بشجع الأهلي والزمالك والإسماعيلي والمصري .

لإن كلنا مصريين وولاد بلد واحدة ولأن الزملكاوي او الأهلاوي خواتي وصحابي .

محتاجين نحب بعض ونحترم بعض مهما كانت إنتمائتنا وإختلافتنا عشان البلد تستفيد و عم كريم القهوجي يستفيد

اخيرا انا بحب مصر وبس وعم كريم القهوجي ميقربليش حاجة .