كتب مراسل الحرب فيليب غيبس سنة 1914:

"كان هناك شيئاً خاطئاً فقد إرتدوا ملابسهم المدنيه مجدداً وبدوا أمام أمهاتهم وزوجاتهم مثل الشباب الصغار لكنهم لم يعودوا نفس الأشخاص لقد تغير شيئاً بداخلهم للأبد"

مرض إضطراب ما بعد الصدمه Post traumatic stress disorder

إتعرف زمان بكذا اسم منهم متلازمة الناجين من معسكرات اعتقال المحرقه النازية أو متلازمة ما بعد فيتنام وسموه ف الحرب العالمية الأولى" بمرض القذيفه" او" مرتجفي الحرب"

يونيو هو شهر التوعية عن اضطراب ما بعد الكرب او PTSD

إيه هو PTSD؟

ده اضطراب بيبدأ بعد حادث مروع ومعنى كلمة مروع هنا إن الشخص فعلا حس بخطر يهدد حياته أو عاش أحداث فيها ناس بيموتوا او بيتعرضوا لتهديد من أي نوع

المرض مشهور وسط الجنود طبعاً لأن مفيش أبشع من الحروب بس كمان بيحصل للناس اللي إتعرضت لحوادث طرق خطيره، الإعتداء الجنسي،الإختطاف، الكوارث الطبيعيه أو أي إعتداء جسدي عنيف.

أعراضه؟

الدراسات أكدت إن الأعراض بتبدأ ف خلال 6 شهور من الحادث وإن اشهرها الذعر والإكتئاب والشعور بالذنب والغضب والحزن بس في 3 اعراض رئيسيه بتميزه وهي :

1-إن المريض بيمر بالتجربة يومياً في دماغه طول ما هو صاحي ع هيئة فلاش باك وبالليل بتطارده علي شكل كوابيس.

2-بيتجنب مواقف وأماكن معينه حتى روايح بعينها لأنها بتثير فيه ذكريات اللي حصل بنفس درجة الألم.

3-بيكون متيقظ دايما ومضطرب ومش قادر يحس بالأمان.

إزاي نتعامل مع المريض؟

مش لازم تكون دكتور علشان تتعامل معاه بس لازم يكون عندك الوعي الكافي واول خطوه إن المريض يرجع لحياته الطبيعيه بسرعه الشغل والرياضه والهوايات القديمه وإكتشاف هوايات جديده هيساعده يندمج تاني مع المجتمع ويبني ثقته في نفسه هيحس بالإنجاز ومع الوقت هيختفي شعوره بالذنب وهيقدر يسامح نفسه ويتجاوز المحنه

من علامات التحسن ان المريض يقدر يتكلم عن اللي حصل من غير ما يحس بالألم لو قدرت تكون مستمع جيد ليه وتدي له فرصه انه يحكي بدون شروط ولا احكام هتكون النتيجة هايله

كمان الجانب الروحاني هيساعد المريض إنه يلاقي الراحه والاسترخاء وهيقوي إيمانه إن فيه قوه أكبر منه هتحميه وهتمنحه حياه جديده.

كتابة Dr-sarah Mohamed