عزيزي القاريء أحنا عرفنا أنواع كتير من الفوبيا زي فوبيا الأماكن المغلقة.....فوبيا الظلام...... فوبيا الطالب المصري من الأمتحان بعد مذاكرة المادة لأول مرة في ليلة الامتحان ...

طب خلينا بقى نعرف كل حاجة عن الفوبيا 


»اي هي الفوبيا ؟ 

الفوبيا بتكون رد فعل بخوف مفرط وغير عقلاني ولو انتَ عندك فوبيا من شئ معين هتحس بإحساس عميق من الخوف مش مجرد خوف عادي وهتحس بكده لما تواجهه مصدر الفوبيا زي وجودك في أماكن مغلقة ،

وكمان هتحس إن الخوف إللي بيحصلك ده شئ مش عقلاني يعني لو سألت نفسك أنا بخاف ليه من الأماكن الضيقة مش هتلاقي لنفسك أجابة عن السؤال ده و في نفس الوقت مش عارف تتغلب على الخوف ده 

و ده ممكن يأثر على يومك وأعمالك خلال اليوم  


»الأسباب بقا إلي ممكن تكون السبب في الفوبيا 

ممكن بسبب عوامل وراثية أو تعرض الشخص لموقف أو حادث مؤلم حصل زي الغرق أو تفجير.......إلخ.


»أنواع الفوبيا كتيرة جدًا ومنتشرة بشكل كبير يعني أمريكا موجود فيها حوالي 19 مليون حالة تخيل العدد ده في دولة واحدة بس


» ف خلينا نعرف بعض أنواع الفوبيا 


»"Social phobia" "الفوبيا الإجتماعية"

المريض بيحس بقلق كبير في المواقف الأجتماعية زي وجوده في الأفراح أو التجمعات الكبيرة و ده ممكن يصعب عليه إلقاء خطبة أمام جمهور كبير وبيحاول المريض يتجنب كل ده وممكن الموضوع يوصل لمرحلة أن المريض يتجنب أقل التفاعلات الإجتماعية زي مكالمة هاتفية


»"Acrophobia"الخوف من المرتفعات

الشخص بيكون خايف من الأماكن المرتفعة زي الأبراج يعني نفترض إن شخص مريض فوبيا من المرتفعات وبقي موظف في شركة ومكتبة موجودة في دور مرتفع ده هيأثر على شغله وهيفقد تركيزة بشكل كبير


في بعض أنواع الفوبيا زي

1-Achluophobia - الخوف من الظلام

2-Algophobia - الخوف من الألم

3-Agoraphobia - الخوف من الأماكن المفتوحة أو الزحام

4-Amaxophobia - الخوف من ركوب السيارة

5-Anginophobia - الخوف من الذبحة الصدرية أو الأختناق

قولتلك الأنواع كتيرة جدًا وهسيبلك المصدر في كومنت علشان لو حابب تعرف كل الأنواع 


»تعالي بقى خلينا نعرف العلاج 

العلاج بيكون بعد تشخيص الدكتور للمريض ويتمثل العلاج في أدوية مخصصة للفوبيا وعلاج نفسي عن طريق تعريض المريض لمصدر الفوبيا بشكل تدريجي لحد ما يتغلب عليها .


و بكده نكون وصلنا لنهاية المقال وأتمنى تكون استفدت و متنساش تحافظ على نفسك و تلتزم بالكمامة والتباعد الإجتماعي وتدعمنا عشان مش هنكمل بدونك دمتم سالمين⁦♥️