الاسبوع القادم .. هو اهم اسبوع هيعدي على مصر في ازمة كورونا الحالية ...

كل الدول اللي سبقتنا .. الفايروس انتشاره انفجر في الاسبوع الثالث .. و خرج عن السيطرة في الاسبوع الرابع .. وطبعا الناس في حالة زهول وفزع من اللي بيحصل وطبعا مش كلهم بيحافظوا علي نفسهم من العدوى وأعدين ف البيوت .. لا النصف الآخر انتهزوا الفرصة بيخرجوا ويتفسحوا وأخدين الموضوع ببساطة جدا ..

مش عارفين ولا واعيين باللي بيحصل وإن بمجرد ما يلامسوا أى سطح موجود عليه الفيروس العدوى بتتنقل بكل بساطة..!!

و عشان كده الاسبوع الثالث بتاعنا هو الاختبار الحقيقي ...

و اللي هيحصل سيناريو واحد من اثنين ...

السيناريو الاول : الناس هتستمر في الاستهانة بالموضوع .. و هيستمروا في اقناع نفسهم ان الموضوع بعيد و هيستمروا في الإهمال و التعامل مع الموضوع على انه حرب اعصاب ..

و إنهم أنصح من كل اللي حواليهم ...

السيناريو ده هيكون معناه ان اللي هيتصاب هيعدي كل بيته و جيرانه .. و حتى اللي واخد احتياطاته هتبقى معركته اصعب و حمايته اصعب .

ده نفس السيناريو اللي حصل في ايطاليا .. الناس خدت اجازات .. نزلت المولات و عملوا تجمعات .. فحدثت المصيبة !

وحاليا بيتم اختيار الناس اللي هتاخد مكان على اجهزة التنفس الصناعي بالقرعة و الباقي هو و حظه. وطبعا كبار السن بقوا يستغنوا عنهم عادي جدًا اللى هو موتوا بقي مفيش ليكوا مكان كدا كدا ميتين عايزين تعيشوا لسه ليه فيه الأهم منكوا !! 

السيناريو الثاني : ان الناس تفهم خطورة الموقف .. و اللي عارف يقول للي مش عارف .. و اللي فاهم يقول للبسيط .. و اللي عنده سلطة ينفذها و يجبر الناس اللي يقدر عليهم انهم يلتزموا . حرفيًا فيه ناس لسه وعيها مش أد كدا وفاهمين الموضوع غلط ودخل في سياسة وكدا وإن إسرائيل هي اللي بتخطط لده ومش مقتنع أبدًا إن دي حقيقة وحاصلة فعلا..

فالسناريو ده .. هو سيناريو الوعي .. ده نفس السيناريو اللي بيطبق في الصين .. الدولة المصدر ... نفس السيناريو اللي خلى مقاطعة ووهان اللي كانت هي المنبع .. انها تحتفل من يومين انها خالية من الفيروس ...😃

الموضوع حسبته بسيطة .. الفايروس مدة احتضانه ١٤ يوم .. لو سيطرنا على نفسنا كمجتمع ٣ اسابيع .. الازمة تخلص .. لان لو كله التزم .. المصاب مش هيلاقي حد يعديه .. و باذن الله يخف .. و اللي بيحافظ على نفسه تبقى مهمته اسهل عشان كل اللي حواليه فاهم و بيتعاون .

دورك دلوقتي انك تختار السيناريو المناسب ليك .. لو ليك اي سلطة او صوتك مسموع .. وصل صوتك و عرف اللي حواليك ان المعركة عايزة كل شخص .. لو انت يوتيوبر او ليك متابعين على السوشيال ميديا .. كلم اللي عندك و عرفهم ان مافيش حاجة اسمها ناس اه و ناس لا في المعركة دي ...

لو عندك حد لسه مقتنع ان الموضوع مؤامرة او انه بعيد عننا .. فهمه ان الكلام ده مش حقيقي .. و ان موقفه السلبي ممكن يتسبب في عدوى لولاده او بيته او زمايله في الشغل .

احنا دلوقتي في نفس الاختبار اللي اتحطت فيه كل الدول اللي قبلنا ... و مع انه هو نفس الفيروس ... لكن كل دولة حصل فيها حدوتة مختلفة على حسب رد فعل شعبها .. و هل فهموا بعض ووقفوا مع بعض و قاوموا الجهل و قاوموا الاهمال .. والا فضلوا فاكرين ان كل االي حواليهم بيبالغوا.. الحكومة عندنا بتعمل اللي تقدر عليه .. لكن مش هيقدروا يتابعونا في بيوتنا .. لازم كل واحد يبقى مسؤول عن اللي حواليه..

هل سيستطيع العالم التغلب علي هذه الكارثة والتخلص منها نهائيًا دون زيادة في أعداد الضحايا ..؟؟.. "وربك علي كل شيء قدير"..

لنا الله

#كورونا_في مصر.